أنــــا

أنا القسى و الجراح .. أنا العمر اللي راح .. أنا الطيبه في زمن الجفاء شئ مباح .. أنا الحنان التائه في بحور الشقاء.. أنا العليل الذي يبحث عن دواه .. أنا الذليل الذي يبحث عن هداه .. أنا الحب في طريق الضياع .. أنا الأمل في طريق الفناء .. أنا القلب الضعيف الذي يستقوي بأحبائه .. أنا من سألت على الجوار و تناست عني الاحباب و الاخيار .. أنا لست رفاً على حائطاً منسي وقت الأحتياج يأتوني سعيا ..أنا النفس السؤال عليها مشقه و البعد عنها يلاقي الترحاب .. أنا فكره حائره تائها عن البال لا تطول سماء ولا أرض ولا في  يوم مكتوبلها الأرتياح .. أنا حلم جميل تغير لـ كابوس مريب في وقت غريب ليس بـه أهل ولا حبيب .. أنا الوحده الطاغيه على فكر عقلي و مشاعر قلبي .. أنا الكرامه و الكبرياء في عز الأهانه و الأستسقاء .. أنا كـ رذاذ عطراً يتلاشى مع الزمن .. أنا مشاعر ساكنه تتمنى الخروج متلهفه .. أنا الكلام المباح الذي لن يأتي إلا في الوقت المتاح ........ أنا أم لـ فراق أبنها باكيه و على بعده متألمه و لله هي مؤمنه وللوطن هي مستسلمه ولـ حقه مدافعه .. أنا شهيد من حبي لـ وطني أفديه و من يكرهه أعاديه .. أنا دم يسيل على تراب وطناً يضيع ليس له نصير في وقت تخلى عنه الداني و البعيد إلا شباب عنيد يدافع عن حقاً أصيل بـ قلباً مستميت .. و كم من أنا لها شبيه و كلاماً كثيرا عنها حبيس .. و كم من أنا مثلي أرادت ان تقول آه و ألف آه 

حكاية دم

زمان قالو دمنا حلال اقتلوهم اسحلوهم موتهم دول مش منّا ولا من دينّا ... قالو كمان ايه اللي وداهم هناك ده تعدي على دوله و الداخليه بتحافظ على هيبة الدوله سلامات يا دوله بررتلهم قتلنا و هل كنا في نظركم شباب الثورة ؟؟؟ لا لا كنتو بلطجيه صيع اطفال شوارع عاهرات !! بقى أحنا كنا في نظركم كدة فعلا على راي البحبحاني عندما تتحدث العاهرة عن الشرف خلوها تبص للمرايه وتشوف القرف... و قولتو ايه كمان فضو اعتصام يا شباب عشان الداخليه تمسك البلطجيه باللجام خلوها تشوف شغلها ... واتقال ده في الاعتصام حفلات جنس جماعي و خمور و مخدارات يا شيوخ اتقو الله ... سال من دمنا كتير و اتقتل مننا الكتير و الكتير و كل ده في حكم العسكر و بطش الداخليه وانتو كنتو بطبلولهم و تبررلهم و احنا بنداس ... وفي  عصركو استبحتو دمنا عشان كرسي و مصلحه مش تهمنا و بـ اسم الدين خليتونا مجرمين . مش كفايه انكم كفرتونا و اضطهدتونا يا اخوانا ارحمونا و اسمعونا ... لكن هيهات هيهات عاملين نفسهم ودن من طين و التانيه من عجين ياخي احييييييييييييييييييه ... و سبحان الله ف غمضة عين يعز من يشاء و يذل من يشاء الاخوان اللي كانو ف السلطة لمدة سنة بقو ولله الحمد مجرد سلطه شوية ف السجن و شوية ف رابعه و اللي اتعمل فينا من الداخليه اللي كانت بتاعتهم بيتعمل فيهم و لا اله الا الله يذيقهم من نفس ما فعلو بنا ... لكن احنا انبل و اشرف منهم لن نشمت ف موت ولا نؤيد قتل و لكن ايضا لا تعاطف للاسف هكذا هم يجنون ثمار ما فعلو بينا طيلة السنتين ونصف سنة ...

ملخص الحوار

لا أؤمن بالحياد لان الحياد ليس نصرة باطل ولكن اهدار الحق ... ولكن ما يحدث هنا هو باطلان يبحثان عن الحق ( اعني داخليه و اخوان ).  فكيف لي ان انصر احدهم على الاخر و الاثنان يداهما ملوثان بدماء شبابنا ... احيطكم علما دمنا و دم اخواتنا لن ننساه مهما كان و لن ننصر من تلطخت ايديهم بهذا الدم ... ارحمونا كفى بكم هراء و ارحلو حفاظا للدماء .

حــــــــــــرام

دمي و دم أخويا حرام . مفيش قتلاهم في الجنه و قتلانا في النار الكلام ده حرام . أحنا مصريين دمنا كله حرام . متقتلش أخوك المصري و تقول عليه ده كافر يا إخوانا حرام . متقولش مرسي نبي ولا رابعه الحرم و لا اسلامكم الاسلام الصحيح ده حرام . أحنا مش كفره ولا منافقين ولا أنتم مؤمنين بجد حرام . موسى نبي و عيسى نبي و محمد نبي و كل من ليه نبي يصلي عليه و اللي يقول غير كدة يتقالو حرام . المسيحين أخواتنا و أهل ذمه ليوم الدين و عكس كدة يبقى حرام . قتلو جيكا و الجندي و ابو ضيف و كريستي و طعنتو في ذمتهم بالذمه ده مش حرام ؟؟؟.. عرو ست البنات و قولتو ايه اللي وداها هناك و اتريقتو عليها دي بنت يا جماعه كفايه حرام .نافقتو غدرتو خنتو سرقتو نهبتو نصبتو مش كل ده حرام . عشان كرسي تقتلو جندي مدني ميهمكوش و مش عاوزنا نقول حرام !!! يـا أخي ستين حرام في حرام . اتفقتو مع قتله و معدومي الضمير و بالنسبه ليكم ده مش حرام لكن الشباب لما يدافع عن بلده و يحافظ عليها يتقالو أنت بلطجي و ده كخه حرام .قولتو على نفسكم اهل القرءان و ححفظة القرءان و معملتوش بكلمه واحده من القرءان هو ده الحرام يا شيخ بـ لحيه مزيفه .دفعتو ب شبابكم عشان مصالحكم و زرعتو الفتنه في مصر و تناسيتم ان ده حرام . تصدقو فعلا نسيت ان مبدئكم الغايه تبرر الوسيله و انتم غايتكم حرام بالتالي الوسيله هتبقى حرام.

الإخوان جبنه .. قتلو جيكا الخونه

الإخوان قتله ... إغتالو ابو ضيف الفسقه

الإخوان مجرمين ..قتلو إخواتنا بإسم الدين

الإخوان سفله قتلو اغتالو سحلووووو

الإخوان مبدئهم :

اقتل جندي أقتل مدني المهم عندنا الكرسي

يــا إخوان

دم جيــكا حرام

دم الجندي حرام

دم أبو ضيف حرام

دم كريستي حرام

دم جنود مصر حرام

دمنا كلــــه حرام

يا جماعة الإخوان المجرمين كفاية نزف في دماء شباب مصر ده أكبر حرام . أقول من تاني ولا فهمتو ان كل ده حرام ؟؟؟

حكاية ثورة لم تنتهي

قالو عننا شباب سيس صايع فاشل معندوش هدف معندوش رؤيا كل همه الجري ورا البنات او سجارة نشد منها نفسيين و البنات مورهاش غير المرايا و الميك آب او اللف على المحلات !!!! محدش منهم توقع ان الشباب ده هيقدر يعمل اللي هما معرفوش يعملوه و نسقط نظام و رئيس. و جت ثورة 25 يناير ثورة الشباب ضحينا بكل غالي و نفيس مهمناش الشو الاعلامي ولا اننا نتشهر كل همنا (عيش حرية كرامه انسانيه ) ازاي نحرر بلدنا من الاستعمار الداخلي تلاقي في الاقتصاد : فساد مالي و استحواذ على الرأس المالي المصري لمجموعة من الناس لا يتعدو ال20 فرد . و في السياسه اللي هي نجاسه مستحوذ عليها الحزب وطنى الفاشي بيمشي اموره بالرشاوي . ولا التعليم اينعم مجاني بس مفيش استاذ بيدرس ولا طلاب بيحضرو اصلا في المدارس . من الآخر منظومه غلط في غلط من أولها لـ آخرها. عشان كدة أحنا خرجنا و ثورنا على النظام ده لكن النظام حارب الثورة دي بكل أسلحته و استشهد مننا الكثير و الكثير. دمائنا روت ارض مصر و لكننا لا نبخل بهذا من أجل الحريه .و ما هي الا 18 يوم حتى تنحى رأس الافعى للنظام الفاشي .فرحنا و اتبسطنا و قولنا شدي حيلك يا بلد الحرية بتتولد لكن للاسف أستولي عليها الاخوان بتحالف مع المجلس العسكري . و أصبحت كل الحكاية تتلخص ان الاخوان استحوذو على السلطه بوساطه من العسكر و الشباب اللي عملو الثورة اصبحو مهمشين ف الحياة السياسيه ..و مرت احداث كثيرة خلال الفترة الانتقاليه العسكرية الاخوانيه منها : محمد محمود 1 و 2 و مجلس الوزراء و غيره.... و فعل العسكر كل ما هو مشين في حق شباب الثورة من قتل و سحل و تعري و فض اعتصام بالقوة و بقى بينا و بينهم دم . و جت الانتخابات مجلس الشعب و الشوري و طبعا الاخوان خدو نصيب الاسد من الكراسي وفصلو قوانين على مزاجهم ما يجعل منهم جماعه ديكتاتوريه. حتى أتى الحدث الاكبر الا وهو انتخابات الرئاسه و اترشح من ترشح و عملنا الجولة الاولى و انتهى الامر الي جولة الاعادة بين خائن و قاتل ... و عصرنا الليمون عشان خاطر ميمون . الله اكبر نجح ميمون و الاسلام دخل مصر .عمنا ميمون جالنا التحرير و فتحلنا صدره قالنا انا مبخافش من حاجه وانا منكم و لكم و شعارات فارغه ما هي الا ثرثرة فارغه .توسمنا خير في الاخ ميمون لكنها اسابيع قليله حتى ظهر الوجه القبيح للاخوان حزب وطنى في هيئة لحى ... هم للبشاعة الاخلاقيه و الدينيه عنوان ... هم لسفك الدماء و التخوين فكرة ... هم للنفاق معلمين ... اقل ما استطيع ان اصفهم بيه ( مجرمين ) . الاخوان في السلطه كالشيطان في عقل الانسان. (اعتذر لأني أخطأت في حق الشيطان ).من الأعلان الدستوري للأتحادية للتأسيسيه للدستوريه حتى جعلو من ميمون ما أشبه ب الأله .. قتلو جيكا الجندي ابوضيف استباحو دماء شباب الثورة الأطهار و اغتصبو حريات بناتنا الأشراف ... اقتصادنا بقى من سئ لـ أسوء و السياسه بقت من امتلاك لـ احتكار و الحرية بقت قيد الاغتصاب ... جتى جاءت تمرد و تواصلت مع عامة الشعب الكادح .مجرد فكرة ما هي الا شهور حتى اصبحت ثورة مكمله للثورة المغتصبه بسبب الازمات المتكررة و المتلاحقة من بنزين و كهرباء و اضطهاد فكري و سياسي . حتى أتى يوم 30/6 و نزل الشعب المصري بكافة طوائفه الفكريه و الدينيه ما عدا الطائفة الفاشية (الاخوان). و في ظل تعجرف الرئاسي و جماعة الاخوان في التحاور مع الشعب الكحيان اللي قرف من تفكير الاخوان و تخوينهم و تكفيرنا و بقينا في نظرهم كفره و منافقين .4 أيام وخلعناه وخلعناه و على سجن العقرب هيتسجن هناك ان شاء الله .ما فعله السيسي ما هو الا  الواجب الذي يحتم عليه ان يفعل ذلك بيس منةً منه او كرم .ان يقف الي جانب الشعب و يلبي نداءه و انقاذ مصر من التفشي الديني اللاواعي لتعاليم اسلامنا الحنيف .نقطه ولسه الثورة مستمرة .

تنويه

أننا لن ننسي ما فعله العسكر ولن نتخلي عن مبادئنا أتجاه الحكم العسكري رغم ما فعله في ثورة 30/6 .

أننا لن ننسي دماء أصدقائنا و أخوتنا الثوريين التي روت أرض مصرنا الحبيبه و سيأتي اليوم الذي حقاً وقتها نستطيع أن نفتخر بما فعلناه من أجل شهدائنا الأبرار .

شهداء ثورة 25 يناير & شهداء محمد محمود 1 و 2 & شهداء وزارة الدفاع & شهداء اولتراس النادي الأهلى ( 72 شهيد ) & جيكا و الجندي و كريستي و مينا دانيال و خالد سعيد و علاء عبد الهادي و الشيخ عماد عفت و الحسيني ابو ضيف و غيرهم كثير ... القائمه مليئه بالابطال الذين نالو الشهادة من أجل حريتنا ... لا نستطيع ان نقول لهم شئ حتى الان لاننا لم نفعل ما هم يتمنوه من أجل مستقبل أفضل سوى الترحم عليهم و قرائة الفاتحة لهم .

إقرأو الفاتحة فـهي واجبة لهم

تمت كتابة المدونة بتاريخ

4/7/2013

الـوشـاح الأســود

جميعنا يخشى مفرق الجماعات و هادم اللذات و قاتل الإبتسامات و الضحكات .إنه يأتي على غفلة ليأخذ أُناس قريبين منا نحبهم و يحبوننا ( أخ أخت صديق صديقه أب أم زوج زوجه أبن أبنه ). فالموت لا يعرف عزيز ولا حبيب فأنه كـ الوشاح الأسود لا نرى من خلفه شئ .يأخذ الروح فـ معادها لا تستاخر ولا تستقدم شئ . يا موت ماذا دهاك ؟ يا موجع القلوب و فاجع الأهل والأحباب يا مذرف الدموع و الآلام .تنهي حياة روح بسبب رصاصة عمياء من اشخاص جهلاء أم في حادث اليم بسبب سيارة هوجاء أم خطأ من طبيبا يحسب من الأغبياء أو إنها مشيئة الرحمن ... فتختلف الأسباب و الموت واحد و لعلنا نتعظ و نرجع إلى الله الواحد الأحد. يا موت أنت اقسو علينا من الحياة ، فأنت تأخذ عزيز لدينا و تترك لنا ذكراه و نتألم بفراقه. يا موت انسانا او تناسنا فالقلوب ضعفت من الوجع و العين احترقت من الدمع و العقل استهلك في استرجاع ذكراه.يا موت أننا نعرف ليس كُلاً منا يملك مصيره فإن مصيرنا بيد الله هو خلقنا و هو يميتنا و هو يعزنا و يذلنا بيده خيرنا و رزقنا .فنحن لا نعلم اين؟ ومتى ؟ وكيف نموت؟ فـالإجابة : بيد الله وحده لا شريك له. يا موت أعلم جيدا إن الذي يقوينا عليك هو حسن الخاتمه فـ اللهم ارزقنا حسن الخاتمه .

الـحـيـاة

قالو الحياة ليها معنى قولنالهم المعنى معرفناهوش . ضحكو علينا و قالو انتو يا جيل جديد مبتفهموش قولنالهم فهمونا يمكن يطلعلها معنى . قالو بصو و افهمو مننا ده احنا جيل زمان و الدنيا كانت آمان و الحياة اخر روقان و ضحكه من القلب تنسيك الأحزان و سؤال جارك عليك ينسيك الخصام و الصاحب وقت الشدة تلاقيه واقف جنب صاحبه لما الشدة تزول و الاخ قلبه على اخوه و الكره مكنش موجود و الحب كان بيسود و الامل كان في عيون كل الوجود .الحياة احساس نفرح لما الناس تفرح و نحزن لما الناس تحزن .الحياة حب ضحك خوف حزن جد .الحياة مواجهة فمتدوش ضهركم للحياة لسه فيها كتير بس انتو مركزين تحت رجليكم بصو فوق و تأملو كل حاجة بتحصلكم و اللي بتتمنوه و مبيحصلش يمكن خير انه محصلش عشان يجيلكم خير اكتر منه .متقفوش على اي حاجة بتتمنوها و محصلتش متخلوش اليئس يتملك منكم اصل الحياة مبتقفش على حاجة .دي الحياة كلها دروس و لسه فيها كتير هتتعلموه منها بس انتو لازم تفهمو ان الحياة ملكنا ومش احنا اللي ملك الحياة . ب أيدنا نقدر نغير حياتنا نقدر نخليها حلوة و نقدر نخليها وحشة بس اعتمدو على نفسكم و بلاش الاعتماد على الغير .. هااا فهمتو معنى الحياة .. اه فهمنا المعنى  دي الحياة طلعت  ابتسامة و حاجات كتيرة ياما . و قال ايه كنتو بتقولو علينا جيل قديم و عجبي !

خيــر الأنـــام

ربنا هو الله خالق الأنام و ديننا هو الإسلام و نبينا محمد رسول السلام (عليه افضل الصلاة و السلام ) . فـ الله واحد أحد فرد صمد خلقنا من طين فـ أحسن خلقنا و صورنا فـ جمل صورتنا و وهبنا عقلا و ميزنا على جميع خلقه . أرسل الله محمد رحمة للعالمين و هاديا و مبشرا للمؤمنين . ولد خير الانام محمداً ابن عبدالله في ربيع الأول قبل عام الفيل من رحم أمه (آمنــه بنت وهـب) قمراً منيـرا . تيتم الأب و الأم و أرضعته و ربته حليمه السعديه فـ كان خيرا و بركة عليها. كفله جده عبدالمطلب على ست و كرمه عمه ابوطالب على ثمان و رعى غنمه ف زاد رزقه .تزوج خديجة فـ أحسن معاملتها .و كان نبينا يذهب إلى غار حراء يتعبد ربه في الخلاء و ذات يوم رجع إلى بيته قائلا لـ خديجه دثرينى دثرينى فـ سألته لما؟؟ روى لها حينما كان فـ الغار نزل عليه الوحي يبشره إن رب الخلائق اصطفاه على ثائر خلقه لـ يكون رحيماً شفيعا بنا و قال لى اقرء .. ما أنا بقارئ ...قال لى اقرء .. ما انا ب قارئ .. فـ قال لي : ( اقرأ باسم ربك الذي خلق ، خلق الإنسان من علق ، اقرأ وربك الأكرم ) ...فـ نشر دعوته و اظهر رسالته و ساندته زوجته خديجة و كانت اول من اسلم من النساء و ءامن معه من ءامن و ظل في مكة ثلاثة عشر عاماً تعرض فيهم للإذاء لكنه أحتمل و صبر. واسري ليلا من المسجد الحرام الى المسجد الاقصي الذي بارك الله حوله و عرج الي السماء مع جبريل الامين و كلم ربه و قص هذا فصدقه المؤمنون و كذبه الكافرون و اشتد عليه العذاب من اهله .وأتى عام الحزن حينما توفا الله عمه و زوجته فـ اشتد الإذاء والبلاء فـ هــاجر الى المدينة (يثرب) و دعا أهلها للايمان بالله و عدم الشرك به فـ ءامنو بيه و ناصروه و بايعوووه ...... انتظروني ف الفصل القادم 

رحلـة إلى عالم آخر ... فصل (2)

غـمــوض

خرجت تيتى من بيتها بتتسحب ماشيه على اطراف حوافرها. عشان محدش يحس بيها من أهلهاو لما خرجت من بيتها سرعة من خطوتها عشان تلحق توصل لـ كرملة قبل ما الصبح يجي .و فجأه سمعت تيتى صوت بيقولها : رايحه فين يا تيتى ؟؟ رااااايحة فين؟ تيتى وقفت و كانت مرعوبة و بصت وراها تشوف مين اللى بيكلمها!!!اووووف هو أنتى :@@ ؟؟؟.طيب بصي و بتقولها  بصوووت خااافت جدا : انا رايحـــه عند كرمله هـــس هـــس س س ولا كأنك شوفتينى بااااااي.

 وصلت تيتى عند بيت كرمله وفضلت تنادى عليها يا كرامله يا غزالتى .طلعتلها كرامله عاوزه ايه يا تيتى منى في الساعة زى دى ؟؟تيتى قالتلها:يا غزال في الغابة ملوش زي انا عاوز اقعد عندك شوية يومين تلاتة اسبوعين شهرين و يمكن سنتين.كرمله بصتلها وقالتلها : وحياة أمك ونأكلك منين ده أنتى همك على بطنك :@ تيتى قالتلها : هعمل دايت اه والله دايت آه وماله.وافقت كرمله ان تيتى تقعد عندها J. واللى ميعرفش كرمله ينزل يسأل عليها في الغابة هيقولولك دى غزاله جمالها لوز ودلعها أوووز الأوووز بتمشى في الغابه تقول : ياغابة اتحرقى مافيكى زى قرنى

 و عدى الليل على مهله على مهله و خرجت تيتى و كرمله يتمشو في الغابه والحيوانات شافتهم بـ استغراب وبيقولو في سرهم : ( اتلم تنتن على تنتون واحد نتن والتانى انتن ) وكالعادة تيتى راحت تقابل زرافها و كرمله سبتهم واتمشت لوحدها و العيون حواليها شافها ثعلوب المكار و فضل يحوم حواليها و مشي وراها يعاكسها يقولها : يا غزال يا غزال و العشق حلال يا غزال يا غزال J . كرمله بصتله كدة بتناكة وقالتله : ميحكمشي هيهيئ ! مسبهاش فضل وراها يعاكسهاو قالها:كعب الغزال يا متحني بـ دم الغزال .كملت مشي ولا كأنها سمعاه .ثعلوب فضل يفكر يوقعها ازاى فـ سبها ومشي .

كرملة قابلت صحابها أرنوب العجيب و سنجوب و خروفي و فضلت تلعب معاهم و يجرو في الغابه  و فجأه تاهو من بعض و كرملة فضلت تدور عليهم لغاية ما كرمله نفسها تاهت في الغابة و الدنيا بدأت تضلم و مرة واحده طلعلها خياااال من ورا الأشجار ..فضلت كرملة تقول مين مين ؟؟ قالها متخافيش يا كراملة متخافيش انا ثعلوب اللى بيحبك .قالتله عاوز منى ايه يا ثعلوب ؟؟ قالها انا !! اعوز منك ايه ؟؟ لا لا انا عاوز ارجعك لـ أهلك. تعالى معايا أمشي جنبي كدة عشان محدش يطلع ياكلك ..ومشيت كرمله جنبه وهى خايفه الجو ضلمه جدا . في نفس الوقت كانت تيتى عماله تسأل و تدور على كرمله يا ارنوب شوفت كرمله ؟؟ اه دى كانت بتلعب معانا و اختفت !! تيتى انهارت في العياط و عماله تقول يا مرارك يا تيتي هروح اقول ايه لـ أهلها ؟؟ تيتي خافت ترجع على بيت كرمله فقررت ترجع لـ بيت اهلها ولما قربت توصل للبيت حصلت مفاجأة !!!

ثعلوب يا ثعلوب هو احنا رايحين على فين؟؟ قالها خلاص يا كرمله قربنا نوصل لـ بيتك ... كرمله شكت في اللى بيحصل فقالتله لا لا ده مش طريق بيتنا و طلعت تجري منه و هو يجري وراها و لحقها ثعلوب و مسكها و خدها لـ بيته و شاااااااااافهم .... 

رحـلة إلي عالم آخر ... فصل ( 1 )

تـيـتـي

كان نفسي أحلم في يوم أنى عايش في عالم آخر عالم مفيش فيه غش ولا خداع عالم مفيش فيه كره ولا نكايه بالآخرين. و مرت الأيام و كنت جاى من الشغل مرهق جدا جدا و قررت أنام بهدومى اللى عليا ولا فكرت حتى اغير و روحت في النوم . صحيت فجأة من نومى لقتنى في دنيا غير الدنيا و بقول لـ نفسي انا ايه اللى جبنى هنا .. انا فين ولا منين بيودى على فين .. ايه العالم ده !! ايه الاشجار الكتيرة دى و الحيوانات دى !! هو انا في عالم الحيوانات ؟؟؟ طب أنا جيت هنا ازاى ؟؟ حد يقولى ؟؟ وايه الأصوات دى هو انا في حديقة الحيوانات ولا في سوق التلات ؟؟؟ حيوانات بتتكلم ؟؟؟ نعم ليها صوت زينا ؟؟ ايــه ده أنا شفاف انا شايفهم و هما لا J. قشطة بقا أنا كدة هعرف أسرارهم كلها . فضلت ماشي ماشي و مرة واحدة لقيت زرافة عماله تجري روحت جريت وراها ما انا لازم اعرف هى بتجري ليه ؟؟ وانا بجرى وراها لقيت مرة واحدة سنجاب طلع من الارض بيقول بصوت عالى : ما تتهدى يا تيتى كل يوم كدة تجرى زى العبيطة يا طويلة يا هبلة يقطع الحب و سنينه !! تيتى بصتله و قالتله : نعم نعم يا دلعدى ما تشوف نفسك وانت فيك شبه من مشط رجلي و كملت جري :)

 سمعت انا الكلمتين دول قولت طلاج تلاتة لـ هجرى وراها و اعرف بتعمل ايه .. و الزرافة تجرى و بتغنى : أنا أسمى تيتى حلوة و مدلعه و بكره بيتى انشالله يولعو. وانا اقول في سري آه يا بنت المجنونة .. هوووب الزرافة تيتى وقفت بطلت جري و عينكم ما تلاقي الا النور زرافة دكر انما ايه مــز كدهون و يستاهل البت تيتى تجري وراه و بعدين لقيته بيديها هديه ( جزرايا ) ايموشن سوووو كيوووت و قلوب بقا . تيتى أغمن عليها  و قالت : زرافي لوف يووو أوووي <3 .تيتى اتجننت و مسكت في بنطولنه و هو يقولها : خدى منى كل حاجة الا بنطلونى الشرف يا بنت الكلب الشرف :@ . خلاص بقا احبيبي سبت بنطلونك عشان خاطر جمال ودانك 

اتنين ليمون و شمسيه هنا ونبي و نسمع اغنية تحت الشجرة يا وهيبه ياما كلنا برتقان . و الحيوانات التانية عمالة تتريق عليها وبيقولو :شايفين البت تيتي الطويلة الهبلة بتحب ازاى !!! ياما نفسنا نتحب كدهون آآآآآخ على اللى حب ولا طالش واللى طال يتحب ولا حبش .. تيتي خلصت وقتها في الحب و هى راجعه بيتها منشكحة بتغنى : وانا ماشيه أدلع آكل جزر آآآآآه جـــزر ..وصلت تيتي بيتها اللى مش عجبها استقبلتها أم تيتي و بتزعقلها : كنتى فين يابت يا مقصوفة الرقبة أنتى ؟؟ كل يوم كدة تخرجى و مترجعيش غير متأخر ماشيه على حل ديلك ولا ايــه ؟؟ ..تيتى : ما هو !! أم تيتي : ما هو ايه ما تنطقي اه طبعا معندكيش حجة زى كل يوم !! يا بت أنطقي كنتى فين ؟؟؟ تيتى : كنت مع زرافي يا وليــه <3 .. أم تيتي: زرافك زرافك مين يابت احيـــــه يابو تيتى احيـــــه تيتي مع زرافها يابو تيتي  التار ولا العار يا بو تيتي .. اقولك: يالا يا بت انجري روقي البيت ..تيتي : يووووه بقا كل يوم ترويق ترويق أمتى هتجوززرافي  و امشي من البيت ده يا ربي L .وراحت تيتى تروق البيت وطالع عينها و عماله تغنى : والله يا زمن زرعنا الشوك عشان يدخل في رجلينا :(  طيب والله لـ هسيب بيتنا الضيق ده و اروح أعيــش عند صديقتى كرملة بيتها أحلى من بيتى J أي نعم هى قصيرة و أحلى منى بس انا رايحلهااااااااااا بس ياريت هى توافق بس  ..... 

يــا شـيـوخـنـا

سياسة دى ولا مصاصة كل اللى يقرب منها يلزق فيها حتى شيوخنا لزقو فيه رغم انهم قبل كدة كانو بيعيبوا على اللى لازقين فيها .. ايــه يا شيخنا أنت و هو هى السياسة مسكرة مكنتش قبل كدة مسخره ولا عشان انت بقيت من اهلها .. و لقينا شيوخنا نسيو نفسهم ونسيو الدروس الدينيه و غيروها بـ كلام السياسة في التلفزيون صوروها و ميعرفوش ان اللي بيدخل السياسة دى ممسوس بـ قذارتها و مكرها و اساليبها العفنة ..ميعرفوش ان الناس واخدينهم قدوة وفي الاخرة يطلعوا حدوة . شيوخنا ضحكوا على الناس بالشريعه و ارادة الله اصلهم بيخدموا مصالحهم الشخصية. متعرفوش باللى بتعملوه ده بتنفروا الناس منكم ..كفاية نفاق لـ أهل السلطة ولا هى بقت سلطة.كنتو زمان بتهدونا لـ ربنا و لـ فعل الخير و دلوقتى بتهدونا لـ فعل الشر بسبب نفاقكم و كذبكم علينا.. عاوزينا نثق في كلامكم عن دينا طب ازاى و انتم اصبحتم منافقين من أجل أشخاص أصبحو في السلطة!!! يا شيوخنا أرحمونا أرجعوا لتعاليم الدين و اشرحو و فسرو القرءان للناس خلو الناس ترجع للجامع من جديد .و افهمو و اعرفو أن ربنا يعز من يشاء و يذل من يشاء .. وان الايام دول بين الناس . وان الانسان كل يوم في شأن . مش هو ده اللى علمتوه لينا ؟؟؟ طب أعملو لـ قدام بقا و على رأي المثل قدم السبت عشان تلاقي الاحد و بقيت الاسبوع و بـ أسلوبكم ده لو استمريتو عليه مفيش أسبوع اصلا هتلاقوه ... يا رب تفهموا الرسالة و تفوقو من اللى انتو فيه . وفي الختام ( ربنا يهدينا وأياكم الى سبيل الرشد و الهدايه ) 

فضفضه على ورق

أوقات كتير بحاصر نفسى بميت سؤال  انا مين ؟ جيت الدنيا دى ليه ؟ اكيد فى سبب ما هوا ربنا قالنا ان كل حاجه ليها سبب ..طب انا بعمل ايه انا بـ آكل واشرب واقعد في البيت ايه الحكمه في كدا ؟ ممكن قعدتى ف البيت تكون ليها فايده لو بفيد اهل البيت او بساعدهم  ايوه بس اكيد ربنا مخلقناش علشان اساعد اهـل البيت واكل واشرب واخرج واقعد على النت هو انا كدا من عمار الارض اللى ربنا قال عليهم ؟..عملت ايه انا أفدت بيه حد او أفدت بيه نفسى حتى ؟ اتعلمت واتخرجت يا فرحتى عملت ايه بتعليمى الشهاده في الدرج وعلى الورق مؤهل عالى .عارف المؤهل ده هيبقى عالى امتى لما تشتغل وتنجح وتبقى حاجه كبيره والناس كلها تسأل انت درست ايه وقتها هيبقى عالى فعلا حتى لو ماكنتش من خريج كليات القمه ..بأيدك تاخد معهد سنتين وتخلى الناس تقول عليه قمه ..طيب ماهو مفيش شغل والبلد كلها قاعده ع القهاوى والحال واقف ..طيب جربت تدور على شغل ..دورت ومالقتش ..مالقتش!!مالقتش حتى شغلانه انك تغسل اطباق..نعم اغسل اطباق  انا اغسل اطباق وماله اللى بيغسل اطباق انت احسن منه في ايه على الاقل بيشتغل وبيصرف ع نفسه مش عاله علي ابوه ..طيب وشهادتى دى ايه ..ماحدش بيتولد كبير البدايه لازم تكون صغيره مش بس صغيره لدى لازم تاخد وقتها علشان تكبر صح لو غسلت اطباق انهارده بعد كام سنه مش بعيد تكون صاحب المحل بس ده مش هايحصل غير لو انت عايز تكون حاجه ..حط هدفك قدامك فكر دايما انك تكون ايجابى ان شاء الله بـ أى عمل بسيط  خليك دايما شايف صورتك انك حاجه كبيره وناجح هاتوقع كتير بس طول ما انت عينك على الصوره لازم هاتوصلها عيد حسباتك راجع نفسك شوف اسلوب حياتك ضيعت قد ايه من عمرك وهاتعمل ايه ف الجاى ولا هاتسيبوا يضيع هو كمان ؟؟؟؟ 

نــــاقـصة

ضبطيه ولا طبليه مفيش فرق ما هما جناس ناقص و النظام في البلد ناقص و الرئيس ناقص و الوزير ناقص و المرشد ناقص و تعليمنا ناقص و الصحة ناقصة و الداخلية ناقصة و السياحة ناقصة و البترول ناقص و الفلوس ناقصة و الادب ناقص ... بلدنا بقت عبارة عن ناقص في ناقص .... مفيش مرة نلاقي حاجة كاملة حتى ثورتنا ناقصة افتكرناها كملت في يوم من الأيام لكن مع مرور الوقت بنلاقيها ناقصة في كل حاجة .و انهاردة يطلع علينا النائب العام بـ قانون الضبطية ما هى ناقصة تطبيل للأخوان و المليشيات .. وايه لازمة الضبطية دى معندناش داخلية ولا النايب شافهم خلاص بلطجية رسمى!!! ولا هو تسهيل لبلطجية بـ لحيـة !! يعنى ايه امشي في الشارع واشوف واحد مش عاجبنى أقبض عليه هو كدة مزاجى يقوم هو يقولى انا اللى هقبض عليك لا انا اللى قبضت عليك انا الاول لا انا الاول و نبي يا اخ مين فينا اللى قبض على التانى الاول ( حوار في شارع ) .. هو سيادة النائب وحشه لعبة عسكر وحراميه ولا ايه ؟؟؟؟ .... مش بقولكم اصلها ناقصة .حتى حياتنا ناقصة نااااقصة كتير .. آه يا بلد الزايد فيكى ناقص ..حتى المدونة دى ناقصة مجتش علي دى كمان تبقي كامله 

نـاقـص حـنـيـه

احنا شعب ناقص حنيه .تسألنى ليه؟؟ اقولك ليييه : عندنا ف مصر الطفل يتوجد على وجه الارض لا زم نزعقله ونشد عليه علشان يحترمنا لو عيط سيبه يتفلق انما اوعى تطبطب عليه احسن يحس انك ضعيف  تكبر شويه وتروح المدرسه المفروض انك مثالى تصحى بدرى وتروح المدرسه وترجع تذاكر وتخلص وجباتك وتنام بدرى علشان المدرسة وطبعا لازم درجاتك تكون عاليه علشان يتفشخروا بيك ..لو وقعت حاجه واحده من دول يا ويلك سواد ليلك ..وان كنت الطالب المثالى ماتلاقيش منهم غيرالمهم ما  تقلش عن المستوى ده نوصل مرحله المراهقه ..ده وحش ماتكلموش ماتتاخرش برا البيت اكتر من كذا العيال دى فاشله وهايبظوك معاهم دايما خناق وتشكيك وعدم مصدقيه   والجامعه انت عيارك فلت بنات وخروجات ومش شايف مصلحتك  ومش عارفه اكلمك وتيجى تجوز واحده مرت بنفس المراحل انتوا الاتنين محتجين حنيه وللاسف ماحدش هايعرف يوصلها للتانى لان فاقد الشئ لا يعطيه تفضل طول عمرك بتدور ع الحنيه ولما امك تكبر وتعجز تقولك انت مفيش فيك حنيه عليا ماعرفش جبت القسوه دى منييين .؟؟... عايزه تعرفى يا امى راجعى حياتنا سوى  وهاتعرفى القسوه دى منين شوفى كام مره خدتينى ف حضنك من غير سبب غير انى احس بحنانك؟ كام مره شوفتنى متعصب ماتخانقتيش معايا وجيتى سألتينى مالك؟ كام مره سهرتى معايا و خدتينى في حضنك بتسمعينى وتعرفى حياتى ماشيه ازاى ؟؟ ها عرفتى انا معنديش حنيه ليــه ؟؟؟ أقتنعتي بقا ؟؟؟

ملحوظة :

أحنا محتاجين حنيه عشان نعرف نكون حنين على غيرنا مش كل اللى مطلوب مننا اننا ندى الناس حنيه و احنا معندناش اصلا و ده بيرجع لـ أسلوب التربية اللى نزعت من قلوبنا الحنية

نــــــــــــاس

ناس تشوفها متحبهاش و ناس تحبها قبل ماتشوفها ... ناس فرقت في حياتك و ناس مفرقتش في حياتها ... ناس على زعلها تخاف و ناس على زعلك متخافش ... ناس تحب تسمعلها و ناس لـ كلامك مبيسمعوش ... ناس بتقول الحق و ناس للحق مبتقولش ... ناس للخير فاعلون وناس بتفعل شر ... ناس تفهم سكوتها و ناس للسكوت مبتعرفش ... ناس للدين فاهمه و ناس مبتفهمش الدين .... ناس بترسم الضحكة و ناس الضحكة رسماهم .... ناس مخلوقة للحب و ناس الحب اتخلقلها ... ناس ناجحة في حياتها و ناس للفشل حياه ... ناس بتحب ناس و ناس للكره احسن ناس ... ناس يتحب تتعاش معاها و ناس معاها متتعاش ... ناس لمسة ايديهم نسيتك الدنيا و ناس الدنيا نسيتك ايديهم ... ناس عاملين فيها فاهمين و ناس للفهم مستعبطين ... ناس بتحب الجنان و ناس الجنان بيحبهم ... ناس بيتعبو لملصحة غيرهم و ناس غيرهم مبيتعبوش ... يا ناس انتو احسن ناس ... يا ناس اعملو الخير و فى البحر ارميه متستناش ... يا ناس اضحكو في وش الناس دي الضحكة صدقة و ده من حديث الرسول اللى ارسله رب الناس ... يا ناس حبو عيشو حياتك نقو قلوبكم من كراهية بعضكم لـ بعض ... يا ناس كل وقت وليه اسلوبه ... يا ناس اوقات السكوت النعمه و اوقات السكوت النقمه يعنى يا ناس متفضلوش على طول ساكتين اتكلمو ... يا ناس ... قل أعوذ برب الناس 

زهـرتى

زهرتى دعي فؤادى ينبض بـ أرق المعانى و الكلمات . دعينى أتغزل فيكى و أوصفك لعـل الوصف يكفي جمالك . دعينى أسترسل شعرا يضاهى حنانك. فكم رأيت في عينيك إبداع صنع الخالق (عز وجل) فـ فيهما نوراٌ يضئ الكون و المجرات . أتعكسين ضوء الرحمن تحت سمائه فتضئي الدروب بالآمال . ان هي وجنتيك محمرة كـ التفاح في أجمل الشجرات . لكن بلى انها همساتك كـ عزف على اوتار العود يطرب الآذان و يقشعر الأبدان .ءأنت حور عين أم خلقت من طين صلصال. مهجتى أنتى النسيم للورد يزور و ريحق الزهور ريحانة كل العصور تفوح منك أنقي العطور . فـ أنتى ياسمينة البستان زينة الجنان مزهرة كـ حدائق الرمان تستحقين أنتى حنان . .شاء الإله أن الناظر إليك يشعر في ملامحك بـ الحياء . تجتثين من نبض فؤادى كرهاً لـ حياة بلهاء عصفت بـه في الأهوال. أتعلمون !!! الجفاء لا يعرف لـ قلبها دربً وهى للغرام ربً . قوامك كـ عروس بحر أنيقةٌ تتبغددو بين شعاب المرجان  حنانها كـ شعاع شمس يذوب في سماء الأكوان . عطائها كـ فيض ماء من كوثر العدنان . وجهها كـ لؤلؤة في قاع البحور سبحان من سواها . فـ الوفاء أنتى أسمي معانيه ,, و الجمال بديع الصنع ستره ,, و في الختام عجز لسانى عن وصفها بـ قليل الكلمات و لعـل هذا يكفي نظير بحور الحب و الحنان ...

سر الثورة المسروقه

وعملها الطيار واتنحى سلمها لمشيره وطار ولبسها المشير واخواته واتكالبوا عليها اﻻوباش والشعب انفض وخلص ثورتنا وخلعوا الميدان واتناسوا النار المدفونه تحت رماد الخرفان وانفض المولد مرواح ياعشان البنيان بنيان الدوله المحروقه المنحوسه الفقريه 

وانتخب الشعب النواب ببطاطس وزيوت وفراخ نواب اخوان خرفان كداب الفم اللى يجامل وينافق ويقول فى رياء وجلسات بتروح وبتيجى وجلسات بتفوت وﻻ ترجع وافقين فى مكانهم نايمين واخدين السلطه فى احضانهم ضاحكين ع الشعب الغلبان فاكرين الناس نسايه وهتشبع بزيت وفراخ ﻻلسه الثوار صاحيين فايقين لكﻻمكوا وفاهمين 

واترشح عشرين علشان كرسى الطيار الفاضى ياﻻياهانم ياﻻ يابيه انا فله وهسد واوفى انا منكوا وليكوا ياحبايبى وانا مسلم دينى وشريعتى اساس الحكم المتاسلم 

وانا وطنى وسلفى وبدقنى البيضه هتكفى والباقى طمعان ف الكرسى والظاهر مصلحه الناس و الكل ينقط بطقيته والشعب الغلبان بيصدق ويغوق الشعب على نكسه يافلولى طيار من تانى يااستبنه اخوانى متمشى من مرشد وجماعته يامصيبتى واتفق الشعب مع تاجر يديله لمون للعصر واتعصر الشعب وبقى حمضى وافترش اﻻرض بقشوره يالمونتى ياحلوه ياجميله جبتيلى استبنه يالمونتى والنهضه دى فشنك ياوالدى 

وناسا داكان تلميذها وكدب فى كدب وقرار والغيه زغى فى رغى كﻻمك سلطه ومحدش بيصدق رغيك وﻻحتى بيفهم خطاباتك وقرارك من مكتب مرشد وكبيرك تهديد بصباعك والحال بقا هو الحال من سنتين وتﻻته وعشره جعانين فى شقا وضلمه وبرد واسعار مرتفعه ومحدش بيعارض فعﻻ وجبهه انقاذ غرقانه فى غفله عايزين الناس تنقذهم من وكسه كبيره يامعارضه بتقول وبتحكى واخرها التنديد ع الكاميرا 

وافكر حبه واتذكر ايام التحرير وجواره ايام الشهدا واخواتنا ايام الخرطوش والغاز 

والناس مسحوله واولهم ستك ياكلب الداخليه يامسعور واخرهم حماده الموكوس المنبوذ من كل الناس على تفريطه فى اغلى ماعنده 

وارجع افكر فين الحق حق الشهدا واﻻبطال من شيخنا عفت ولمينا للالتراس ولجيكا والجندى وسعد وابوضيف اموات احياء فى حياتنا فضحوهم قاموا خرسوهم بس الحق لسانه طويل والسلطه الواطيه متواطئه ونيابه ونايب ووزير 

منين العدل ياحكومه منين العدل ومنين الرحمه من سنتين كان عز واكلها دلوقتى الشاطر يبلعها والريس وعشيرته اتفضحوا بطمعهم ف السلطه انكشفوا 

وحفﻻت براءات جماعيه ومساعدات من هنا وهناك ومساعدات ﻻخوانا ف غزه وترحم عليهم وبكاء وناسنا تموت تتعذب واﻻخر هما اﻻوباش ياحكومه وسلطه وتجار باادين واقفين للحق وكاتمين 

الشعب خﻻص موجوع مجروح بالخرطوش والحى سواء 

ياشعب فوق واتحرك متسبش حقك يتاخد من سنتين عملتوا الثوره وغلطوا يوم المرواح باقى فساد اﻻندال والموجود دلوقتى خسيس اندال زى اﻻسﻻف وفى يوم هيكون اﻻتى معلش ياهضبه وﻻ تزعل من حبى اليك بقتبسك 

اااااه بعد الليالى واﻻيام علشان ادوس عليك اه بشتقلك ياخروفى 

  انحيك وارميك فى البيت

بقلم هيثم صلاح

مـتـديـن بـطـبعـه

بيقولك متدين بطبعه !!! أحنا شعب متدين بطبعه طب ازاى ؟؟؟ عاوز اثبات او دليل .. فين الاثبات و الدليل ؟؟؟ لما المسئولين عن البلد بيقولو كلام و يرجعو فيه و يلقو وعود و ينقضوها و بينافقو عشان مصلحتهم جه يبقا اسمه تدين بطبعه ؟؟؟ كل يوم حالات تحرش و يقولك متدين بطبعه لا يا سيدنا ده كدة متحرش بطبعه ولا اي اندهااااااش !!! لما موظف يقبل رشوة و العميل سهل انه يدفعها و يقولك متدين بطبعه معرفوش ان الراشي و المرتشي في النار ؟؟؟ لما الولاد ليل مع نهار بيعاكسو في البنات و يقولو كلام مش ولابد يعنى يبقا كدة متدين بطبعه ؟؟؟ ولا البنت تلبس فيزون و تمشي ف الشارع و تتعاكس و تقول هو انا بتعاكس ليه ؟؟؟ مش ده تدين بطبعه !!! ولا تاجر جملة او صاحب محل بيخزن البضاعة عشان لما تشح ينزلها السوق و يغلى سعرها ده استغلال ولا تدين بطبعه ؟؟؟ الطلبة اللى بتغش في الامتحانات و الناس اللى بتغش ف الميزان و صانعتها و يبعلك حاجات غير صالحه هو الرسول (عليه الصلاة و السلام ) مش قال من غشنا ليس منا ؟؟؟ ولا ايه!! طيب اللى بيحشش و بيشم و بيشرب بيره دول اسمهم ايه ؟؟ تبع الشعب المتدين بطبعه؟؟ واللى بيحصل ف الافراح الشعبية وما ادراكم بالافراح الشعبية نسميه ايه؟؟؟ الناس اللى بتسب الدين عمال ع بطال ف هزار او خناقة نقول عليهم ايه ؟؟؟ السرقة و النهب و قطع الطريق و الاغتصاب و الاتجار ف المخدارات و كل ده بيحصل كل يوم نقول عليهم ايـه؟؟؟ الشباب اللى همه يتفرج ع افلام اباحيه و خلاص دى شغلته في الحياة نوصفهم بـ ايــه ؟؟؟ ولا الشيوخ ع القنوات الدينيه يقولو الفاظ لا تليق ب لقبهم واللى منهم بيقذف النساء بالباطل واللى يبيح قتل يتقال عليهم ايه؟؟؟ متدين بطبعه ؟؟؟ طب ازاى ؟؟؟ ولا الحاكم ب امر الله الشيخ الجليل العلامة النابغة السيد الاستاذ الدكتور اللواء المستشار رئيس الجمهورية بيقولو عليه بيعرف ربنا طب ادونى امارة ؟؟؟اه مركب دقن و حافظ قرءان و بيقول قال الله و قال الرسول و بيصلي فرض ب فرضه ... لا لا تصدقو كدة عارف ربنا و متدين بطبعه !!! طب والباقي هتقولو باقي ايه ؟؟ مانتو عارفين مرسي واللى عمله و بيعمله و هيعمله... ولا اقولكم الحقو العرض قبل ما يخلص ركب دقن و صلى ركعتين و قول قال الله و قال الرسول و صوملك يومين يبقا انت كدة شيخ و متدين بطبعك واعمل اي حاجة تانيه نافق استغل اقتل خون اخدع اقذف اتهم ذمم و هيتقال عليك ف الاخر الشيخ فلان الفلان ... وتيجو تقولو ف الاخر متدين بطبعه !!!!

تنويه

انا بتريق ع الناس اللى بيقولو علينا شعب متدين بطبعه مبتريقش ع التصرفات لانى زى بقية الشباب بيعمل حاجات كتير غلط وان الله غفور رحيم ... منجيش نقول بقا متدين بطبعه و فينا كل العبر من كبيرنا لـ صغيرنا المهم اننا نعترف بغلطنا و نصلحه بس مظنش غير لما الحاكم و المسئول و الشيخ و الداعية يكونو عارفين تعاليم دينهم كويس يبقاوقتها  بقية الشعب يتقال عليهم ده شعب متدين بطبعه 

#حزب_المواكيس_الأحرار

بقولكم من كتر الاحزاب اللى ظهرت قررنا ان ننشئ حزبا يعرف للهلس طريقا J .. حزبنا مش اي حزب .. حزبنا مش حزب هز الوسط .. حزبنا حزب مسخرة على الواقع و كل اللى فيه عضو واقع ... حزبنا حزب موضوعى آآآآآآه يا ضلوعى ... حزبنا حزب كل موكوس اتوكس بدرى بدري ... قالك !!! هاااا قالك ايــه ؟؟ يا عم استنى !!! استنى ايـــه بس قاااااالك ايه ؟؟؟ قالك اسم الحــــــــــــــزب

حــزب الـمــــواكـيـس الأحـرار

و شرووطنا :

شروطنا شرط مش مشروط منحبش نشرط على حد مبيحبش الشروط  بس بنقولكم اقبول الشروط دى قشطة خلاااص قشطة ... و نقوووووووووول : 1-  خدووو بالكوو أحيـــــــه اللبن فار :@@ هو كدة أتحرق ؟؟؟ طيب المهم أسمنا المواكيس الاحرار.

2- مش عاوزين شتيمة يا موكوس منك له معانا ولاااايـة في الحزب  #بجد

3-  عندك كلمة Like  في اللينك ده دوس علية هتلاقي نفسك عضو ف الحزب (http://www.facebook.com/HzbAlmwakysAlahrar )

4- هاشتاج الحزب ( #حزب_المواكيس_الأحرار ) أكتبه ف البايو شروط ضرورى جدا بالنسبة للاعضاء المؤسسين اما بقية الاعضاء بمزاجكم بقا مش هنخنفكم J

5- عاوز تعمل فولو للاعضاء المؤسسين بمزاجك عادى بس عارف هتندم بقا :P

6- اللوجو للاعضاء المؤسسين يحطووه افاتار و بقية الاعضاء هيدر قشطات يابا..

الاعضاء المؤسسيين :

فرانكو و ده رئيسنا  @3mooora_Franko و  أوشا دى نايبتنا الاولى @Foxfofaz  و سرنجة نايبتنا التانية @SeRnGaA  و جـــو راجل الميديا و السياسة @Gogo_Dx  و هدير ديرو مسئولة دفاعنا @DeROoo_AnA و سي ابراهيم محلل كورة @ebrahimelkhadm و سنيوريتت القهوة بلاك بلوك الحزب @kokasaied و ندى مسئولة التعليم @NadoFouad و شين الطبخ ده لعبتها @Leaderwebsite و فريسكا معاها حواديت البنات @EmooUa07 و ذرة سكر الصحة بين ايديها @Tarneem_Sherif و سيمبا للشعر ساخرة @Do_Simba و سنفورة مكافحة الفيك حاسة سابعه عندها @BbyLawyer و نجار عن الفن مستهزءا @M7mdElNagar ...

أهدافنا :

اهدافنا اهداف خياليه بس المواكيس هيخلوها واقعية للضحك و الهلس مسخرة هذليه J

1-   عاوزين نجمع المواكيس في حزب واحد يتوكسو مع بعض .

2-   نفكها على الناس و نبعد عنهم الكئابة و النكد و نضحكهم كركركر.

3-   نقول قرار عشان نرجع فيه اه مزاجنا كدة .

4-   هنقلعك بنطلونك و لما يسألوك هنقول انت اللى قلعته بمزاجك آه .

5-  الوليه عماد الحزب عشان كدة مفيش تحرش مش كفاية الواقع اعتبرها اختك يا اخى.

6-   عشمنى بالحلق خرمت انا ودانى لـ الحلق جانى ولا اتسدت ودانى ..ولايه الحزب يتحدثون

7-   هنتريق و نهلس على كل حاجة ف واقعنا و ممنوع الجد و الكئابة و النكد.

تفاصيل :

كل عضو مؤسس مسئول عن قسم في الحزب ليه يوم معين هيقول ماتريل خاصة ب قسمه هنتريق عليها بعيد عن الجد و الواقع و هتعرفو ده فى البيدج و هنكتب ده ف هاشتاج الحزب اللى هو ده ( #حزب_المواكيس_الأحرار ) و ممنوع منعا بتا الشتيمة و اي الفاظ خارجة ف هاشتاج الحزب من جميع الاعضاء .

يـــا مـــرسي

يا حكومة مرسي أمتى تفهمى شعبك الغلبان واعى مبقاش غبي ...  يا مرسي بداتها بـ جيكا لحد الجندى أمتى ناوى تبعد عن اللى زيهم .... يا مرسي انزل و بص تحت رجلك قبل ما تدوس على ولاد بلدك ... يا مرسي الموت عندنا بقا عادى ... ... يا مرسي شعبك نصه مات شهيد و النص التانى هيموت على الحديد ... يا مرسي انت فاكر ان شعبك دمه رخيص نايم على رصيف .... يا مرسي انت نسيت نفسك ولا نفسك نسيتك ؟؟؟ نسيت ازاى نجحت يا مرسي ؟؟؟؟ يا مرسي شباب بلدك عصرو على نفسهم لمون و انتخبوك و بـ غبائك ضيعتهم من حواليك ... يا مرسي خليت شباب الثورة عدو لدود ليك و اللى حواليك بيتمحكو فيك و في كرسيك .... يا مرسي كرسي السلطة غيرك ؟؟ طب و ايام البورش تـحب أفكرك ؟؟؟ يا مرسي فوق من حلم كبير انت عايش فيه عشان متصحاش على كابوس يقصف بـ رقبتك انت و جماعتك ... يا مرسي انزل النجوع و الارياف انزل و شوف الصعيد الجوانى انزل و شوف العريان و المريض و المحتاج و الفقير .... يا مرسي داخليتك عريت الراجل و الست داخليتك أحلى من التيت .... يا مرسي في أم مكلوبة فقدت ابنها يا ترى تقدر تجيب حق ابنها ؟؟ ... يا مرسي عيشتنا في كئابة و نكد امتى بقا تسيب البلد ... يا مرسي الشعب نفسه يعيش و لو على لقمة عيش ... يا مرسي قولتلنا في عدالة بس احنا مشفناش غير ندالة ... يا مرسي قولتلنا في حرية بس احنا مشفناش غير وسط تحيه .... يا مرسي قولت كرامة احنا مشفناش غير مهانة ... يا مرسي انا كتبت عنكم مدونة قالك تحب اقولك ؟؟؟ ولا انت ودن من طين و تانية من عجين !!! يا مرسي ارحمنا و سيبنا في حالنا وشك شوئم علينا مشفناش في عهدك يوم حلو ولا حتى مر كل ايامك نكد في نكد ... يا مرسي يا مرسي يا مرسي حسبي الله و نعم الوكيل فيك ..... ارحـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــل 

قـالـك

قالك !!! قالك ايه قالك آه ... قالك أحنا في بلد بيتسمع فيها الـ آه بـ مليون آه و آه ... قالك كتير و قليل و ياريتك ما سمعت قالك L

قالك الاسلام هو الحل و شعارنا هو دينا .. قالك احنا اتعذبنا و اعتقلنا و دخلنا السجون ... قالك انتخبنا و هنعارض النظام و نجيب حقكم ... قالك مفيش اتفاقات بينا و بين النظام .. بس قالك مفيش نزول في مظاهرات العيال ... مرة واحدة قالك احنا نازلين مع اطهر شباب في ثورتهم .. ( نفاق مصلحة ) ...   قالك يسقط يسقط النظام و هو مقضيها اتفاقات معاه :@ ... قالك هييييييييييييييييييييييه اسقطنا نظام و رئيس و هما اصلا ابليس .... قالك عاوزنها مدنية مفيش عسكرية و هما مطبخنها سوا ... قالك نعم للتعديلات هتشوف الجنة هتقول لا ف جهنم يا كفره ... قالك عاوزين برلمان من رحم الثورة و هما سبونا نتسحل و نتعري على ايد العسكر و خانونا L ... قالك ايه اللى وداهم هناك ... قالك انتخابات البرلمان و هنترشح ع 50% بس و هوووب تلاقيهم خدو 70% !!! قالك احنا مجلس نواب الثورة و طلعو مجلس نهب الثورة ... قالك الله أكبر الله أكبر بتقول ايه يا سيادة العضو المحترم ده اذان الضهر و ياتري سيادتك بتعمل ب كلام ربنا ؟؟؟ قالك الفتاه تتجوز عن عمر 9 سنين ؟؟؟ آه ما هما متدينين بطبعهم ..بالأمارة قالك مسكنا نائب سلفي فى وضع مخل ف طريق مظلم يا نهااار الوان قالك لا لا لا دى بنت اخته قالك لا لا لا دى خطيبته قالك لا لا لا و في الاخر يا ترى قالك ؟؟؟؟ ... قالك مجلس النواب باااااااااااااااطل ... قالك هندخله بالقوه طب فين احترام دولة القانون ؟؟؟ قالك قانون باطل ... عصام العريان ,, ماله؟؟؟ قالك أين البرلمان ؟؟؟ مصيبه تحصل قالك اين البرلمان ؟؟؟ قالك لن نرشح رئيس لـ مصر ... وبعديها ’’’ قالك رشحنا رئيس لـ مصر و برنامجنا النهضة ارادة شعب ,, الحق ده قالك ارادة لما نشوف ؟؟؟... قالك انا واحد مننا ,, قالك معا نبنى مصر ,,, قالك مصر القوية ,,, قالك بالحب !!! حب ايه اللى انت جاى تقول عليه J ...قالك اعادة بين الوطنى ب لحيه و وطنى منعمها "" طب و بعدين ؟؟؟؟ قالك اعصر ليمون و انتخب مرسى ,, قالك ده شارك فى الثورة ,,, قالك هنعرف نعارضه ,,, قالك الله أكبر و تحيـا الثورة مرسي كسب يا مينز ... وايه اللى حصل : قالك أهلى و عشيرتى !!! أوبا بداية القصيدة كفر و كلنا قولنا أحـــــيه... قالك وسع ياض و فتح جاكته مش لابس واقي من الرصاص انا منكم و هخدمكم قولنا الله أكبر جالنا كابتن أمريكا ... قالك اعادة محاكمات قتلت الثوار .. قالك لو الشعب ثار عليا و ده مهيحصلش هخضع لـ ارادة الشعب ... قالك هحترم القانون و الدستور !! يا ترى أحترم ؟؟؟ قالك حصن التأسيسية و الشورى من القضاء و اعزل النائب العام .. ليه يا عم ؟؟؟ قالك مزاجى كدة حد ليه شوق في حاجة ؟؟ قالك اسلق التأسسية و ننجزها ف السريع عشان الاستقرار ... قالك هننزل ضد مرسي عشان يرجع عن اللى فى دماغه ... قالك ده فلول بلطجية علمانين كفرة مسواهم النار و بئس المصير ... قالك خلاص حاضر هرجع ف الاعلان بس كدة و كدة !! حد خد باله لا يا رئيس ... قالك نعم للدستور عشان العجلة تدور ... قالك اللى هيقول لا هيضرب استقرار مصر .... قالك ده احسن دستور ... قالك مبروك علينا دستورنا المسلوق عشان الحموضة .... قالك نهضتنا جاية جاية !! فعلا جت بس ع الدم الشعب ... طب حصل ايه ,, قالك 50 طفل ماتو ف حادثة قطر L طب الريس فين ؟؟؟ قالك شعب غزة يستغيث . طب و شعبك اللى بيموت ,, قالك مش اهلى و عشيرتى .... قالك سبب الحادثة نظام مبارك .... طب المسئوليه السياسية ؟؟؟ قالك هو مرسي هيمشي قبل اي قطار ... قالك جيكا كريستى محمد الجندى ايه اللى وداهم هناك ؟؟؟ اه اصله قالك أين البرلمان ؟؟؟؟ و قالك!!!

اقدر اقولك أنا رايي المتواضع قد تتفق و قد تختلف : أولا مفيش راجل سياسة بيدور على مصلحة مصر كلهم بيدورو على مصالحهم الشخصية و كرسي السطلة بما فيهم جبهة الانقاذ... ثانيا مرسي و جماعته لسه مفهموش الشعب المصري و بيبصو على مصلحتهم و بيعوضو اللى حصلهم في ال 80 سنة .... ثالثا الاخوان منافقون خائنون خداعون كاذبون كارهون الخير لـ غيرهم ... رابعا الشعب مطحون بين المعارضة و الحكومة لو كانت هما الشعب كانت قدمت تنازلات و المعارضة لو كان همها الشعب مكانتش عاندت و تمادت و ف الاخر دماء شبابنا في أعناقهم لـ يوم الدين و حسبنا الله و نعم الوكيل