جت في بالى فكرة .... أنى أركب
القطار مرة .... سمعت كتير عن حكاويه ....
فقررت أنى أعيش يوم فيه .... و من هنا تبدأ حكاوينا .. : حكاوي القطار .
تعالو عيشو معايا رحلتى في القطار
كانت رحلة شيقة و ممتعه جدا جدا و عرفت فيها كتير و ناس كتيرة .....
هنبدأ يومنا من بداية وجودى على
الرصيف و مستنى القطار اللى هيوصل ع الساعة 1:50 .
كنت واقف في حالى لا بيا و لا عليا و
ببص في ساعتى بشوف الساعة كام عشان القطار أتأخر على معادة لقيت واحدة ست كبيرة في
السن
بتقولى : ونبي يا بنى هو القطر جه و
لا لسه .. فقولتلها : لسه مجاش يا حجة .. قالتلى : هو ديما بيعملها كدة على طول
ديما متأخر على معاده كدة .... قولتلها : انتى يا حجة اصلا جاية متأخر أحمدى ربنا
أنه متأخر اصلا .. قالت : آه ونبي يابنى على رأيك يارب يتأخر كدة على طول عشان
الحقه ... الست سبتنى و مشيت و انا قولت في سيري سبحان مغير الاحوال!!!
و بعد نص ساعة بحالها !! القطر جه و
حالة هرج و مرج بين الناس ... اللى يقول الحق اركب بسرعة و اللى يقول احجزلى جنبك
ياباشا و اللى يقول انزلو بسرعة عاوزين نركب و اللى و اللى ... إلخ
الحمدلله أنا ركبت طبعا و لحقت مكان
ليا اصله كان زحمه جدا جدا . و حظى بقا قعدت جنب أمين شرطة و عريف في الجيش . و
القطر اتحرك و ناس رايحة وناس جاية بيدورو على أماكن و في وسط الزحمة دى تسمع صوت عالى
بيقول : حاجة ساقعة بيبس !! أها ده أكيد الراجل اللى بيبيع البيبسي و تسمع اللى
بيقول : أّذأذ يابيه واشتري لب تسلى نفسك في الطريق.
و مرة واحدة تفاجئ بصوت بيقولك :
تذاكر تذاكر .. تذكرتك يا بيه طبعا ده الكمسري اللى بيصحيك من أحلى نومه مفرق
الاحلام J .
و بعد فترة يبدأ الكلام بينى و بين
اللى معايا و كل الكلام على مصر و الاخوان و نظام البلد.
بس الاتنين اتفقو على ان الاخوان
هيودوا البلد في داهية و قالو كلام مقدرش اقوله طبعا.
في القطر ده بيمر على الواحد ناس
كتيرة اشكال و الوان ناس نازلة وناس طالعه .. اللى بيشتغل في الجيش واللى متطوع في
البحرية و اللى باقي ليه اشهر بسيطة و يخرج من الجيش و الموظف اللى مروح بيته بعد
عناء الشغل و الطالب و الطالبة اللى مروحين بيتهم بعد يوم من الدراسة و اللى بيبيع
لب و بيبسي و بسكويت و ساندوتشات و كتب و
مصاحف و اساتيك و غلاف البطاقات و الشاي و غيره كتير .. إلخ و اللى رايح شغله
الفترة المسائية ناس كتير كتير عالم تانى بتعيشه ف القطر.
و طبعا كل كرسين في وش بعض بيتكلموا
في موضوع معين هتلاقي : اللى بيتكلم في السياسة و خلط الدين بالسياسة و ظلم
الاخوان و اللى بيدافع عنهم . واللى بيشكى حالته المادية وانه عاوز يجهز بنته اللى
ع وش جواز و اللى بيدور ع شغل و مش لاقي و اللى بيتكلم عن شغله اللى تعبه و مديره
اللى مزهقه في عيشته و تلاقي ناس تانية تضحك و بتهزر و بتقول نكت و تلاقي و تلاقي
و تلاقي و تلاقي ... الخ
و بعد مشوار طويل القطر وصل محطته
الاخيرة و كل الناس بدأت تنزل و استفدت حاجة واحدة من الرحلة دى :
أن الواحد مش عايش في الدنيا لوحده
في غيرنا كتير عايشين معانا و كل حد فينا فيه علة ... محدش يفتكر ان الدنيا دى ليه
لواحدة ولازم نعمل حسابهم معانا .
